Heydər Əliyev azərbaycançılığı haradan və necə başladı...

Heydər Əliyev azərbaycançılığı haradan və necə başladı...

Onun adı və fəaliyyəti Azərbaycan etnocoğrafiyası ilə məhdudlaşmır.  Azərbaycan xalqının böyük oğlu, müstəqil Azərbaycan dövlətinin qurucusu, Azərbaycan siyasi sisteminin yaradıcısı, azərbaycançılıq ideologiyasının banisi, Azərbaycanda milli özünüdərk prosesinin başladıcısı və idarəedicisi Ulu öndər Heydər Əliyev Azərbaycan xalqının dövlətçilik tarixində o qədər böyük yeniliklərə, o qədər böyük işlərə imza atıb ki, yuxarıda sadaladığımız titulların heç biri Onun titanik fəaliyyətini tam əhatə etmir. Biz bu gün Azərbaycan tarixində Heydər Əliyev erasını yaratmış Ulu öndər haqqında danışarkən, adətən, Onu bir Ümummilli lider kimi səciyyələndiririk. Əlbəttə, bu, mübahisəsiz olaraq belədir. Amma bu zaman bizə elə gəlir ki, Heydər Əliyevin fəaliyyətini bir qədər məhdudlaşdırmış oluruq. Onun fəaliyyətinə bir qədər sırf milli kontekstdə yanaşmış oluruq. Lakin Heydər Əliyev şəxsiyyəti və Onun fəaliyyəti təkcə Azərbaycanın etnosiyasi coğrafiyası ilə bağlı deyil və Ulu öndərin bir siyasətçi kimi fəaliyyəti də Azərbaycanın etnosiyasi coğrafiyası ilə məhdudlaşmır. O, istər Sovet xalqları müstəvisində və istərsə də Şərqi Avropadan tutmuş, hətta, Afrika ölkələrinə qədər olan xalqların tarixində rol oynamış, onların yaxından tanıdığı və onların həyatına təsir edəcək proseslərə imza atmış bir şəxsiyyətdir. Ona görə də, hesab edirik ki, bu gün Ulu öndəri hörmətlə anarkən Heydər Əliyevşünasların və Heydər Əliyev sevərlərin, tədqiqatçıların araşdırmalı olduğu elmi istiqamətlərdən biri də, məhz, bu olmalıdır. Biz bu gün Ulu öndərin bu vaxta qədər tədqiqatdan və ümumi kütləvi yanaşmadan kənarda qalan fəaliyyətinin bəzi spektrləri haqqında fikirlərimizi bildirməyə çalışacağıq. Ümumi yanaşma Ulu öndər Heydər Əliyevin azərbaycançılıq ideologiyasını məhz Azərbaycanın siyasi rəhbərliyinə gəldikdən sonra başlatdığı yönündədir... Ancaq biz hesab edirik ki, Ulu öndər Heydər Əliyev azərbaycançılıq ideologiyasının əsaslarını, rüşeymlərini hələ Sovet dövründə Azərbaycanın Dövlət Təhlükəsizlik Komitəsinə rəhbərliyi dövründə başlatmışdır. Biz bilirik ki, Dövlət Təhlükəsizlik Komitəsi Sovet dövrünün ideoloji və siyasi əsaslarını formalaşdıran, onu idarə edən və yönləndirən əsas orqan idi. Və təəssüf ki, Sovet Azərbaycanı dövründə Ulu öndər Heydər Əliyevə qədər Dövlət Təhlükəsizlik Komitəsinə rəhbərlik edən azərbaycanlı olmamışdır. Azərbaycan xalqının, Azərbaycan ziyalısının, Azərbaycan dövlətçiliyinin, Azərbaycanın düşünən beyinlərinin başına gələn faciələrin əsas törədicisi və əsas ideyavericisi də, məhz, bu sistemdən doğurdu. Və biz bilirik ki, Sovet quruculuğu prosesində, 1937-ci il repressiyasında, həmçinin, ondan sonrakı dövrlərdə  Azərbaycan xalqının ziyalılarına qarşı törətdiyi repressiyanın mərkəzi, məhz, təhlükəsizlik orqanları idi. Bu təhlükəsizlik orqanları sanki Azərbaycanın daxilində Antiazərbaycançı qüvvələrin mərkəzini, konsentrasiyasını təşkil edirdi. Bu yanaşma Ulu öndər Heydər Əliyev milli təhlükəsizlik orqanlarına rəhbərlik edən günə qədər davam etdi. Onun rəhbərliyi dövründə isə respublikanın təhlükəsizlik orqanlarından Antiazərbaycançı qüvvələr, Azərbaycanı sevməyən müxtəlif xalqların nümayəndələri təmizlənməyə başlandı. Və azərbaycançılıq ideologiyasının rüşeymi də, milli özünüdərk prosesinin rüşeymi də elə oradan cücərməyə başladı. Bundan sonrakı mərhələdə Ulu öndər öz fəaliyyətini siyasi sahəyə transfer etdikdən sonra, yəni, 1969-cu ildə Azərbaycan Kommunist Partiyası Mərkəzi Komitəsinin birinci katibi seçildikdən sonra artıq bu rüşeym daha bir münbit sferaya düşməklə siyasi populyarlıq qazandı. Beləliklə, artıq 1978-ci ildə Ulu öndərin həyata keçirdiyi fəaliyyət nəticəsində Azərbaycan dili Azərbaycan Sovet Sosialist Respublikasının dövlət dili kimi Azərbaycan Konstitusiyasına düşdü. Hesab edirik ki, bu, Ulu öndərin Azərbaycan xalqı qarşısındakı misilsiz xidmətlərindən biri idi. İdeyanın ideologiyaya çevrilməsi və kütləvi mənimsənilməsi Həmin dövrdə artıq azərbaycançılıq ideyası bir ideya şəklindən, yəni, bir fərdin, bir siyasətçinin, bir öndərin ideyasından ideologiyaya çevrilməyə başladı. Təsadüfi deyil ki, bu ideologiyaya çevrilmə prosesi də, məhz, ideya müəllifi tərəfindən həyata keçirildi. Bundan sonrakı mərhələdə azərbaycançılıq ideologiyasının xalq tərəfindən mənimsənilməsi, dərk olunması prosesi başladı. Bu istiqamətdə atılan ilk addımın ilkin nəticəsi isə, məhz, Bakı şəhərinin azərbaycanlılaşdırılması oldu. Çünki biz bilirik ki, o dövrdə Bakını istənilən yerdə və istənilən şəkildə ümumi universal möhürü beynəlmiləl şəhər möhürü idi. Bu beynəlmiləl şəhər bir kosmopolit bakılılar anlayışını özündə birləşdirməklə, milli ünsürləri rədd edirdi. Beləliklə, hətta o dövrdə mərkəzi hakimiyyətdə Dərbənd kimi neft mərkəzi olan Bakını da hansısa bir şəkildə federasiyaya bağlamaq, bu mümkün olmayanda isə, heç olmasa Bakının azərbaycanlılarından qorumaq siyasəti həyata keçirilirdi. Kosmopolit Bakıdan milli Bakıya doğru Məhz bu zəncirləri, yəni, Bakını azərbaycanlılardan ayıran o zəncir halqalarını Ulu öndər qırdı. 1969-cu ildən başlayaraq 1970-ci illərdə böyük dövlət xadimi Heydər Əliyev tərəfindən Azərbaycanın regionlarından, rayonlarından, kəndlərindən azərbaycanlıların məhz Bakı şəhərində məskunlaşdırılması ilə Bakı bir Azərbaycan şəhərinə çevrildi və azərbaycançılığın ilk nəticəsi Bakının azərbaycanlılaşması oldu. Və əlbəttə ki, bu proses həm iqtisadi, həm siyasi,  həm milli intellektual  müstəvidə baş verirdi. Yəni, regiondan gələn gənclərin işlə, qalacaqla təmin olunması, məskunlaşması  prosesi vardır. Həmin dövr Azərbaycanda həm sənaye müəssisələri tikildi, həm yataqxanalar tikildi, həm də yeni qəsəbələr və mikrorayonlar salındı. Beləliklə də, Bakı azərbaycanlaşdırıldı. Biz, sadəcə Ulu öndərin siyasi ideoloji  fəaliyyətini təhlil etdiyimiz üçün iqtisadi və sosial məsələlər barəsində çox danışmaq istəmirik. Heydər Əliyev erası müxtəlif sosial, iqtisadi və ideoloji qatlardan ibarətdir Biz Ulu öndərin fəaliyyətinə, Azərbaycan xalqı qarşısında xidmətlərinə nəzər saldıqda görəcəyik ki, dediyimiz bu era ayrı-ayrı qatlardan və mərhələlərdən ibarətdir. Bu qatların və mərhələlərin hər biri Azərbaycan xalqının tarixində ayrıca səhifədir. Ən əsası odur ki, bu səhifələr Azərbaycan xalqının və dövlətinin inkişafını özündə ehtiva edən, onu stimullaşdıran səhifələrdir. Əlbəttə ki, Ulu öndərin hakimiyyətinin ikinci dövrü Onun SSRİ rəhbərliyinə aparılması ilə bağlıdır. Bu dövrdə də yenə Azərbaycan daima Ulu öndərin diqqətində olmaqla respublikamızın inkişafı başlıca məsələ kimi SSRİ rəhbərliyinin diqqət mərkəzində tutulurdu. Və nəhayət Ulu öndərin sonrakı mərhələdəki fəaliyyəti Onu artıq müstəqil bir dövlətin, müstəqil bir xalqın lideri kimi səciyyələndirməyə imkan verir. Genetik olaraq, liderlik keyfiyyətlərinə və yüksək xarizmaya sahib olan Heydər Əliyev heç kəsin proqnozlaşdıra bilməyəcəyi proseslər baş verərkən, XX əsrin sonlarında bunları proqnozlaşdırmağı, həmçinin, öz yeri və mövqeyini bu proseslərin içində müəyyənləşdirməyi dəqiqliklə bacarırdı. Eyni zamanda, Onun qəbul etdiyi şəxsi qərarlar bir növ Azərbaycan xalqının siyasi qərarlarına çevrilirdi. Ən əsası isə bu qərarlar uzaqgörən və məqsədyönlü, konkret hədəfə doğru istiqamətlənmiş olduğu üçün bizim ümummilli yolumuzu işıqlandıran mayaka çevrildi. Azərbaycan xalqının milli özünüdərkinin bərpası və müstəqillik mübarizəmizin uğurla sona çatması üçün Ulu öndər böyük xidmətlər göstərdi 20 Yanvar faciəsindən sonra Moskvada Azərbaycanın Daimi nümayəndəliyinə gələrək, xalqının ağır günündə onun yanında olduğunu nümayiş etdirən Ulu öndərin bu addımı bütün dünyaya səs saldı. Əslində bu, Azərbaycanın milli dövlətçilik prinsiplərinin elan olunması və hədəflərinin göstərilməsi idi. Əlbəttə ki, Azərbaycan xalqının milli özünüdərkinin bərpası və müstəqillik mübarizəmizin uğurla sona çatması üçün Ulu öndər Heydər Əliyev böyük xidmətlər göstərdi. Baxmayaraq ki, o dövrdə, istər siyasi baxımdan, istər iqtisadi baxımdan, istərsə də mənəvi-psixoloji baxımdan daim məhdudiyyətlər və təzyiqlər altında fəaliyyət göstərirdi. Amma Naxçıvana gələr-gəlməz dərhal Naxçıvan MR Ali Sovetində Azərbaycanın bugünkü bayrağını və eyni zamanda, Azərbaycanın tarixi bayrağını-1918-20-ci illərdə dalğalanmış üçrəngli bayrağımızı, məhz, xüsusi qərarla Naxçıvan Muxtar Respublikasının Ali Sovetinin binası üzərində ucaltdı. Bu addımın özü xalqın milli azadlıq hərəkatına yeni keyfiyyət, yeni ruh və optimizm gətirdi. Hesab edirik ki, bu da tariximizin yaddaqalan, maraqlı və gərəkli səhifələrindəndir. Ondan sonrakı mərhələdə, əlbəttə ki, Ulu öndərin fəaliyyət sferası daha da genişlənməyə başladı. Azərbaycandan ilk dəfə olaraq imperiya əsgərlərinin çıxarılması və bir xarici dövlətlə sərhədlərin qorunmasının özümüzə qaytarılması da Heydər Əliyev erasında tariximizə yazılan qızıl səhifələrdəndir. Müstəqil dövlətimizin tərəqqisi Heydər Əliyevin adı ilə bağlıdır Əlbəttə ki, başqa maraqlı bir dövr Azərbaycanda vətəndaş müharibəsinin qarşısının alınması ilə bağlıdır. Bu, olduqca mürəkkəb və təzadlı bir dövr idi. Azərbaycan dövləti parçalanmaq təhlükəsi ilə baş-başa qalmışdı. Həmin dövrə diqqətlə nəzər salsaq görərik ki, Ulu öndər Heydər Əliyev dahi bir dövlət xadimi kimi Azərbaycan dövlətinin və dövlətçiliyinin mənzərəsini çox aydın şəkildə görür və onun struktur formulasını müəyyənləşdirərək nəyin, necə olmasını dəqiq cizgilərlə qura bilirdi. Məhz bunun nəticəsi idi ki, müstəqil Azərbaycan dövləti quruldu. Məhz Ulu öndərin həmin dövrdə həyata keçirdiyi siyasət nəticəsində bu gün Azərbaycan müstəqil dövlət kimi, yəni, formal müstəqil deyil, həqiqi müstəqil dövlət kimi tanınır. O, böyük müəllim, mükəmməl natiq, dahi təbliğatçı idi Ulu öndərin başqa böyük keyfiyyətlərindən biri də Onun böyük müəllim, dahi təbliğatçı və mükəmməl natiq olmasında idi. Heydər Əliyev “ideya, ideologiya və təbliğat” universal üçlük formulasından çox məharətlə istifadə etməyi bacarırdı. O, ideyanı verir, onu ideologiyaya çevirir və həmin ideologiyanın kütlə tərəfindən mənimsənilməsini təmin edirdi. Elə Azərbaycanı birləşdirəcək universal formula olan azərbaycançılıq ideologiyasının da müəllifi, təbliğatçısı və icraedicisi, məhz, Ulu öndərimiz olub. Əslində, bir xalqın vahid ideologiya ətrafında təşkilatlanması üçün illər keçir. Yəni, hər hansı bir ideologiyanın mənimsənilməsi, öyrənilməsi və xalqın həmin ideologiyanın daşıyıcısına çevrilmə prosesi uzun illər, bəlkə də qərinələr, yüzillər aparır. Amma Ulu öndər özünəxas xüsusi çevik üsul və metodlarla bu prosesi elə etdi ki, qısa müddətdə azərbaycançılıq ideologiyası Azərbaycanın başlıca milli-siyasi ideologiyasına çevrildi. Bir qədər sonra isə bu öz müsbət bəhrəsini verdi. Azərbaycanda bu ideologiyanın bərqərar olması və mənimsənilməsi ilə ölkəmizdə etnik separatçılığa son qoyuldu. Heydər Əliyev dövlətin siyasi və ideoloji varisliyini təmin etdi Ulu öndər elə böyük dövlət və siyasi xadimlərdən idi ki, dövlətçiliyin siyasi-ideoloji əsaslarını yaratmaqla bərabər, eyni zamanda, onun varisliliyini də təmin etdi. Hər hansı bir dövlətin var olması üçün mütləq ideoloji-siyasi varislik lazımdır. Əgər bu olmasa, dövlət bir nüfuza, liderə, bir fiziki şəxsə bağlı olduqda, o şəxsin fiziki-bioloji mövcudluğu bitdikdən sonra dövlətin də ömrü bitir. Məhz bunu bilən Ulu öndər dövlətçiliyimizin siyasi-ideoloji varisliliyini də təmin etmiş oldu. Heydər Əliyev üçün biz çoxlu titullar deyə bilərik. Ümummilli lider, Ulu öndər, Azərbaycan Respublikasının siyasi rəhbəri, Sovet İttifaqı Kommunist Partiyası Mərkəzi Komitəsinin Siyasi Bürosunun üzvü, müstəqil Azərbaycan Respublikasının Prezidenti və s. Bunlar əlbəttə ki, hamısı bir titul, bir vəzifədir. Amma Heydər Əliyev şəxsiyyəti bütün bunların hamısının fövqündə duran bir nümunədir. Yəni, bu bir həqiqətdir ki, bütün bu vəzifələrdən və titullardan Heydər Əliyev Azərbaycan xalqının milli və dövlətçilik maraqlarının təmin olunması üçün istifadə etdi. O, bir millət mücahidi idi, xalq mücahidi idi, Azərbaycan xalqının böyük mücahidi idi, Azərbaycan xalqını beynəlxalq münasibətlərdə böyük arenaya çıxarmağı qarşısına məqsəd qoymuşdu. Azərbaycan  həqiqətlərini dünyaya çatdırmağı qarşısına məqsəd qoymuşdu. Müstəqil Azərbaycan dövlətinin əbədi olmasını qarşısına məqsəd qoymuş böyük bir mücahid idi. Prezidentlikdən tutmuş digər titul və vəzifələr isə Onun üçün, məhz, bu məqsədləri həyata keçirmək üçün bir mexanizm və vasitə idi. Ona görə də, Ulu öndər Heydər Əliyev Azərbaycan xalqı tərəfindən daima hörmətlə anılacaq. Xalqımız var olduqca O, da yaşayacaqdır.  «Yeni Azərbaycan» qəzetinin baş redaktoru Əməkdar jurnalist  Hikmət Babaoğlu  (Məmmədov)

ƏBƏDİ QƏHRƏMAN

Böyük ömrün anları

Əsl Azərbaycanlı Lider Heydər Əliyev

Dövlətim üçün layiqli vətəndaş yetişdirirəm

Dövlətim üçün layiqli vətəndaş yetişdirirəm

Hər bir insanın həyatında  əsas rolu olan kimlərisə olur. Bu həmin insanın anası, atası, müəllimi və başqa  yaxını və hətta kənar adam ola bilər. Həyatını, sağlamlığını, hətta deyərdim ki, bütün varlığını həmin insanın yaşaması, həyatda özünə layiqli yer tutması üçün fəda edən pərvanə insanlar...

Bu gün onlardan birisi haqqında sizlərlə bölüşmək istərdim. Onu nəinki ölkəmizdə hətta sərhədlərimizdən  çox-çox uzaqlarda belə hər kəs tanıyır. “Azərbaycanlıyam” – deyən kimi, ixtiyari xarici ölkə vətəndaşının dediyi ilk söz: “Sizin milli lideriniz Heydər Əliyevdir” kəlamı hər bir azərbaycanlıda fəxr hissi oyadır.

Bəli, bizim Ümummilli liderimiz, fəxrimiz, ölkəmizi sərhədlərindən çox-çox uzaqlarda tanıdan, vətənimizin adını yüksəklərə qaldıran, dilimizi, dinimizi, mədəniyyətimizi, millətlər arası münasibətlərdə tolerantlığımızı qoruyub gələcək nəsillərə miras qoyan əsil azərbaycanlı - Heydər Əlirza oğlu Əliyev...

Bəli, kiminsə həyatında rolu olan bir əziz insanı olur. Millətin, xalqın həyatında əvəzsiz rolu olan Böyük insan – onun Ümummilli lideri Heydər Əliyevdir.

Hərdən adamı təəccüb götürür. Bir insan ömrünə necə sığışır Onun gördüyü işlər? Axı adi insan həyatı boyu nə qədər işlər görə bilər? Özü üçün, vətəni üçün, ailəsi üçün hər hansı bir ata həyatı boyu nələrisə edir. Heydər Əliyev isə öz həyatını bütünlüklə milləti, xalqı, vətəni üçün fəda edərək, ölkəmizin suverenliyi və tərəqqisi, müstəqil Azərbaycanın təşəkkülü və inkişafına həsr etmişdir.

Heç kəsə sirr deyil ki, 34-illik hakimiyyəti dövründə Heydər Əliyev müstəqil Azərbaycan dövlətinin qurucusu, memarı olmuşdur. Ən çətin vaxtlarda Azərbaycana  gəlmiş Ulu Öndər xarabalıqlar üzərində bir memar dəqiqliyi ilə vətənimizi yenidən qurmuş, yaşatmış və inkişaf etdirərək çiçəkləndirmişdir.

Tariximiz boyu Tanrı bizi çox sınaqlara çəkib və nə yaxşı ki, çətin anlarımızda ondan imdad diləyən analarımızın səsini eşidib və bizə Heydər Əliyev dühası bəxş edib.

Acı qanlar bahasına uzun illər həsrətində olduğumuz müstəqilliyimizi 1991-ci ildə qazanmağımıza baxmayaraq, 1993-cü ildə itirmək təhlükəsi vardı. O vaxt ölkədə olan qarışıqlıq, anarxiya, xaos, 1993-cü ilin iyununda ölkədə vətəndaş müharibəsi,qardaş qırğını təhlükəsi yaratmışdı, nəinki müstəqilliyimizin itirilməsi, bütövlikdə Azərbaycanın dünya xəritəsindən silinməsi təhlükəsi vardı.

Tarixə nəzər salsaq, çox uzaq olmayan 1918-1920-ci illərdəki müstəqilliyi qoruyub saxlaya bilməməyimiz buna bir sübutdur. Hətta 1988-1990-ci illər, ermənilərin Dağlıq Qarabağı ayırmaq tələbləri, Sumqayıt hadisələri, hegemonluğunu itirmək istəməyən imperiyanın Bakıda törətdiyi Qanlı Yanvar hadisələri və səriştəsiz rəhbərlərin yeritdiyi siyasət nəticəsində torpaqlarımızın 20%-dən çoxunu itirməyimiz də bunun acı nəticəsidir.

Ölkənin, xalqın qüclü bir liderə ehtiyacı var idi. Və xalqın tələbi və təkidi ilə Heydər Əliyev yenidən hakimiyyətə gəldi. Bu, çox böyük bir tarixi hadisə, Azərbaycan xalqının həyatında yeni bir dönüş nöqtəsi idi. Biz yenidən bir çox xalqlar kimi azad və müstəqil şəraitdə yaşamaq imkanı əldə etdik.

 Bəli, Azərbaycanı parçalanma və məhv olma təhlükəsindən xilas edə biləcək yeganə bir şəxsiyyət Heydər Əliyev idi. Və buna görə də xalqın qəti iradəsi ilə, demokratik və qanuni yolla yenidən ölkə rəhbərliyinə qayıdan Azərbaycan xalqının Böyük oğlu, Ümummilli lider statusunu qazanmışdır.

Azərbaycanda yeni tarixi mərhələ - dövlət müstəqilliyinin möhkəmləndirilməsi dövrü başlandı. Beləliklə, tale özü Azərbaycanı yenidən dirçəltmək, onun müstəqilliyini qorumaq kimi çətin və şərəfli bir missiyanı məhz Heydər Əliyevə həvalə etdi. Heydər Əliyevin hakimiyyətə qayıdışı ilə müstəqilliyimiz xilas edildi. AZƏRBAYCAN  RESPUBLİKASI PREZİDENTİNİN  ANDİÇMƏ  MƏRASİMİNDƏki  NİTQində dediyi kimi:

<<Müstəqil  Azərbaycan Respublikasının qarşısında duran əsas vəzifələrdən biri  Respublikanın dövlət quruculuğunu təşkil etməkdir. Bizim yolumuz aydındır, bunu dəfələrlə bəyan etmişik. Yolumuz demokratiya yoludur. Müstəqil Azərbaycanda demokratik, hüquqi dövlət qurulmalıdır. Azərbaycan dövləti demokratik prinsiplər əsasında fəaliyyət göstərməlidir, öz tarixi ənənələrindən, milli ənənələrindən bəhrələnərək, dünya demokratiyasından, ümumbəşəri dəyərlərdən səmərəli istifadə edərək demokratik dövlət quruculuğu yolu ilə getməlidir. Bizim yolumuz bu yoldur və mən sizə bir daha söz verirəm ki, biz məhz bu yolla gedəcəyik.>>

Və məhz bu yolla gedən Heydər Əliyev Azərbaycana rəhbərlik etdiyi illərdə uzaqgörən daxili və xarici siyasəti ilə ölkənin nüfuzunu artıraraq, hərtərəfli inkişafına nail olmuş, müstəqilliyini əbədi və dönməz etmişdir. Azərbaycan Heydər Əliyevin uğurlu siyasəti sayəsində dünyada tanınan nüfuzlu bir dövlətə çevrilmişdir. 1993-cü ildə müstəqil Azərbaycan Respublikasının Prezidenti seçilən Heydər Əliyev siyasət aləmində çox güclü, səriştəli və təcrübəli müdrik dövlət xadimi kimi qısa bir müddət ərzində xarici siyasət sahəsində böyük dönüş yaratmışdır. Dünyanın aparıcı dövlətləri, inkişaf etmiş ölkələri, beynəlxalq təşkilatlar Azərbaycana ciddi diqqət yetirməyə başlamışlar. Ən çətin anlarda belə Heydər Əliyev yenilməz siyasi iradə,qətiyyətli mövqe və müdriklik nümayiş etdirmişdir.

Ümummilli lider Heydər Əliyevin Lissabon sammiti zamanı göstərdiyi müdriklik xalqımızın tarixinə qızıl hərflərə yazılmışdır. Neçə illərdən bəri Ermənistan havadarları ilə birlikdə dünya diplomatiyası sahəsində Azərbaycanın düşmən obrazını yaratmış, nəticədə ölkəmiz siyasət aləmində təklənmişdi. Məzh Lissabon sammitində Heydər Əliyev Azərbaycan haqqında yaranmış qeyri-obyektiv münasibəti və səhv baxışları alt-üst etdi. Onun uzaqgörən siyasəti, BMT-nin yüksək kürsüsündən çıxışları nəinki Avropanı, bütün dünyanı Azərbaycan haqqındakı qeyri-obyektiv mövqeyini dəyişməyə məcbur etdi. Bunun bariz nümunəsi məzh Lissabon sammitində qoyuldu ki, burada səsvermədə 52 dövlət  Azərbaycanı müdafiə etdi. Bu, böyük qələbəni  xalqımıza məzh Heydər Əliyev qazandırdı.

Ümummilli lider Heydər Əliyevin müdrik daxili və xarici siyasəti nəticəsində hüquqi demokratik dövlət quruculuğu, Milli Ordunun formalaşdırılması, beynalxalq aləmdə Azərbaycanın nüfuzunun yüksəldilməsi sahəsində böyük işlər görülmüşdür. Ulu öndərimiz Heydər Əliyev dünyanın bir çox aparıcı dövlətlərinin rəhbərləri, nüfuzlu beynalxalq təşkilatlar və işgüzar dairələrdə yüksək səviyyəli rəsmi görüşlər keçirmiş, Azərbaycan həqiqətlərini, dövlətimizin mövqeyini dünyaya çatdırmışdır. İşğal edilmiş torpaqlarımızın azad olunması istiqamətində ardıcıl, fəal xarici siyasət yürüdülməyə başlanmışdır. «Əsrin müqaviləsi» imzalanmış, təhsilimiz, iqtisadiyyatımız  yenidən qurulmağa başlanmış, elmimiz dünya təhsil sisteminə inteqrasiya olunmuşdur.

Umümmilli liderimiz Heydər Əliyevin hakimiyyətə qayıdışı ilə təhsil sahəsində gördüyü işlər, təhsil sistemində islahatlar sadə azərbaycanlı müəllimi kimi məni də hədsiz sevindirir. Onun müəllim adını hər şeydən üstün tutması qəlbimi fərəhlə doldurur:

<< Mən yer üzündə müəllimdən yüksək ad tanımıram.>>

<< Biz hamımız həyatımızda əldə etdiyimiz nailiyyətlərə, bütün varlığımıza görə müəllimə borcluyuq.>> deyən Ulu öndərimiz gördüyü işlərlə bunu bir daha sübuta yetirir.

 Adətən insan ömrünü onun gördüyü işlərin miqyası,dəyəri ilə ölçürlər. O insanlar dünyada,tarixdə əbədilik qazanırlar ki, onlar Tanrının bəxş etdiyi qeyri-adi istedadlarını, fövqəl güclərini, iradələrini insanların xoşbəxtliyi,xalqlarının azadlığı, dövlətlərinin çiçəklənməsi üçün sərf edirlər.Bu baxımdan xalqımızın böyük oğlu,dünya şöhrətli ictimai-siyasi  xadim,Ümummilli lider Heydər Əliyevin 80 illik ömrü tariximizə qızıl hərflərlə həkk olunmuş, dünya tarixində layiqli yer tutmuş, nadir şəxsiyyətlər cərgəsində dayanmışdır.

Ümummilli liderimizin zəngin həyatı həmişə təhsillə bağlı olmuşdur:

<<Məktəb,maarif,təhsil işi ilə həmişə sıx bağlı olmuşam…Hesab edirəm ki,cəmiyyət haradan olursa olsun,nədən olursa olsun,kəsib təhsilə xərcləməli,gənc nəslin təhsilinə ,müəllimə kömək etməlidir.Bu,mənim prinsipal mövqeyimdir.>>

Bu kəlamlar böyük rəhbərimizin təhsilə nə qədər önəm verdiyinin təzahürüdür.

<<Təhsil millətin gələcəyidir.>> deyən Ümumilli liderimiz Heydər Əliyev təhsil sistemimizdə olan problemlərin optimal həlli üçün Azərbaycan tarixində ilk dəfə Təhsil sahəsində islahatlar aparılması üçün tapşırıqlar vermiş,bu məqsədlə 1998-ci il martın 30-da Prezident sərəncamı ilə Azərbaycan Respublikasında Təhsil Sahəsində İslahatlar üzrə Təhsil naziri M.Mərdanovun sədirliyi ilə Dövlət Komissiyası yaradılmışdır.

1998-ci ildə müstəqil  Azərbaycan müəllimlərinin 1-ci qurultayı keçirilmiş və xalqımızın böyük oğlu Heydər Əliyev qurultayda tarixi çıxış etmişdir.Bu çıxış təhsil işçilərinin qarşısında duran vəzifələrin həlli üçün bir proqram idi.Qurultayda təhsil tariximizdə ilk dəfə Respublika Təhsil Şurası yaradılmışdır.

Ulu öndər 1999-cu ilin iyunun 15-də Milli Qurtuluş günündə Təhsil Sahəsində İslahat Proqramını xüsusi sərəncamla təsdiq edərək təhsil sistemində islahatların əsas məqsədini  müəyyən etmişdi:

<<Təhsil sistemində islahatların əsas məqsədi ondan ibarətdir ki,Azərbaycan təhsil sistemi dünya təhsil sisteminin standartlarına uyğunlaşdırılsın….On illərlə  əldə etdiyimiz təhsil prinsipləri gözlənilməli və inkişaf etdirilməlidir.Əgər biz bu yolla gedəriksə,qısa bir zamanda Azərbaycanda təhsil sistemini dünya standartlarına çatdıra bilərik>>.

Ümummilli liderimizin rəhbərliyi,tövsiyəsi ilə hazırlanmış proqramlar,strateji yol Azərbaycan təhsilinin, onun maddi-texniki bazasının uzunmüddətli,dinamik inkişafını təmin etmişdir: <<Məktəbə, təhsilə qayğı  və kömək Azərbaycan dövlətinin siyasətində mühüm yer tutur.>>

Ulu öndərimizin daxili və xarici siyasəti,iqtisadi plan və proqramları bu gün Heydər Əliyev məktəbinin layiqli yetirməsi, möhtərəm prezidentimiz İlham Əliyevin rəhbərliyi ilə uğurla davam edir və edəcək.

Respublikamızın Prezidenti cənab İlham Əliyev Ümumilli liderimizin ideyalarını ləyaqətlə davam etdirərək təhsilimizin inkişafına, təhsil müəssisələrinin maddi-texniki bazasının möhkəmlənməsinə böyük diqqət yetirir.

Azərbaycanın birinci xanımı, Heydər Əliyev Fondunun prezidenti, YUNESKO və  İSESKO-nun xoşməramlı səfiri, millət vəkili Mehriban xanım Əliyeva  bu gün Azərbaycan təhsilinin qayğıkeşidir.

<<Məktəblərimizdə Azərbaycan dövlət müstəqilliyinin, azadlığının mənası geniş tədris olunmalıdır. Bu, çox əhəmiyyətlidir, çünki vətənpərvərlik hissləri insanlara uşaq vaxtından aşılanmalıdır.>> Bugünkü azərbaycan məktəblisi böyük fəxarətlə Cavanşiri, Babəki, Tomrisi, Atabəy Şəmsəddin Eldənizi, Uzun Həsəni, Qara Yusifi, Şah İsmayıl Xətaini, Səttarxanı, M.Ə.Rəsulzadəni, F.Xoyskini, S.Mehmandarovu, Ə.Şıxlinskini və b. bu kimi bir çox tarixi şəxsiyyətləri, onların vətən tarixində rolunu öyrənir.

 XX yüzillikdə xalqın daha bir Dahisi yetişdi-Heydər Əliyev. Mustafa Kamal Atatürk, Corc Vaşinqton, Cəvahirləl Nehru və başqaları kimi  Heydər Əliyev də dünya tarixində layiqli yer tutmuş  tarixi yaradan idi, tarixin özü idi...

Tarix sübut edir ki, istənilən dövrdə hər hansı bir xalqın qəhrəmanlıq salnaməsini dahi şəxsiyyətlər, xalqı öz arxasınca apara bilən liderlər yazırlar. Bəli, Azərbaycanın müasir tarixini Ulu öndər Heydər Əliyev vətənə təmənnasız xidmətiylə, qəlbində döyünən Azərbaycan eşqiylə, min bir əzablarla, vətənpərvər dəyanətiylə yazdı. Ömrünü Azərbaycan Respublikasının inkişafına, xalqımızın tərəqqisinə sərf etmiş Heydər Əliyevin fenomen bir şəxsiyyət kimi ölkəyə rəhbərlik etdiyi dövrdə həyata keçirdiyi misilsiz işlər, uzaqgörənliklə apardığı konstruktiv siyasi xətt, ümumiyyətlə, Heydər Əliyev vətənpərvərliyi müasir gənclər üçün örnək olmalı və bir ibrət dərsi kimi öyrədilməlidir.

Buna görə hər  bir  Azərbaycan  müəlliminin  ən əsas vəzifə borcu   Vətənimizə layiqli şəxsiyyətlər, düşməndən qisas ala biləcək  vətənpərvər əsgərlər yetişdirmək, müstəqil və demokratik Azərbaycanı yaşadacaq  vətəndaşlar tərbiyə etməkdir.

Məmmədova Sənubər